傳說①：無法逃離的大廈（上）
網上瘋傳閉路電視片段，
一男一女在天恒邨大廈升降機內憑空消失，
到底是惡意玩笑，還是兩人誤闖「凶間」？
「阿忠，你睇下啲樓盤，又貴咗啦！我哋點算呀？」一個只有二十來歲的女生，正用那誇張又尖銳的聲音，在一名男生身邊大喊。
「Tina，唔緊要啦，我哋依家住嗰度都幾好呀！」這名叫阿忠的男生，正嘗試安撫身邊這名稱為「女朋友」的生物。
「幾好？好乜鬼嘢呀，你嗰度公屋嚟㗎！我唔係話公屋唔好呀，咁你都要諗下將來㗎嘛！唔通我同你結咗婚，我又搬埋嚟住囉喎！你諗下你屋企幾多人？你仲要同你細佬同房，咁到時我點呀？同你喺下格床瞓，你細佬就瞓上格床咁呀？仲有呀……」Tina聽完阿忠的回答，便開始發起牢騷來。
阿忠在一旁不敢作聲，只能不斷點頭回應，因為他知道，Tina一旦開始提出結婚買樓這些話題時，他不論回答甚麼，都只會換來吵架收場。
所以，在累積了好幾次戰死沙場的經驗後，他學懂了沉默是金的道理，雖然耳朵需要承受將近一小時高分貝的噪音攻擊，但總比吵架時帶來的物理性傷害來得划算。
趁著Tina在吵鬧的時間，先跟大家介紹一下，阿忠，全名謝兆忠，二十八歲，大學畢業出來工作了數年，總算由Teller升做General Banking Officer。
這兩個職位有甚麼分別？
簡而言之，Teller只是櫃枱員工，負責一般銀行事務；而General Banking Officer需要負責跑數，但請不要誤會，這絕不是一份多勞多得的工作。
自從金融風暴、歐債危機……唉，原因多得不想細說，總括來說就是一個字：難！
過往月入六位數的員工，現在業績能做到每月達標已是十分不錯。
像阿忠這種新人，每天就是受盡責罵和加班的煎熬！
另外，阿忠這個位置，每天所受的氣，簡直不是一個正常人能夠忍受的，但阿忠仍然能勉強撐下來。
為甚麼？
還不是為了自己和Tina的將來。希望早日跟Tina組織家庭的這個心願，即使再辛苦也好，為了生活，他只好忍了。
說到Tina，她比阿忠小了一歲，是阿忠在大學時的學妹。
近水樓台，阿忠便是這樣贏得了Tina的芳心。那時的Tina並不像現在這樣，她不會發牢騷，不會為了住屋而跟阿忠吵架，也不會為了金錢而去發脾氣。
以往他們可以簡簡單單，在公園逛逛、到茶餐廳吃個快餐、喝杯用苦澀檸檬泡出來的檸茶，便已經開開心心的度過一天了。
但無奈社會逼人，Tina出來工作後，很快便認識到世界的殘酷，也了解到過往的自己是有多天真！
所以她經常跟阿忠去討論將來，甚至會忍不住對阿忠發牢騷。
每次Tina對他發牢騷時，阿忠實在很不高興，只是工作時訓練出來的忍耐力，使他一次又一次的強忍。
「我其實都係想同你一齊先諗咁多嘢，你明唔明呀？」Tina經過差不多一小時後，最後無力的說。
「我明，我梗係明啦！我應承你會努力儲錢，同埋我都有諗過㗎，每次出居屋我都有抽㗎。同埋，最近圍村啲村屋都幾靚㗎，我哋搵日一齊去睇下啦。」阿忠知道，當Tina發完牢騷後，只要自己能夠說出一些比較實際的計劃，便能成功安撫Tina。
果然，這次也成功了，Tina的怒火平息了。
約會結束後，阿忠送了Tina回柴灣後，他便獨自乘坐港鐵回天水圍。
對，你沒有看錯，Tina真的是住在柴灣，阿忠亦的確是住在天水圍。但千萬不要誤會，是阿忠自己要送Tina回家的，Tina從沒有提出過這樣的要求，只是某次阿忠到Tina家作客時，剛好碰到鄰居在大吵大鬧，之後更拿出菜刀在走廊失控胡亂揮舞。最後雖然沒有任何人受傷，但也驚動了整個樓層的人。自此以後，不管平日工作有多累，阿忠都盡可能送Tina回家。
在車程中，阿忠認真地考慮買樓的事情，但不論如何計算，他實在無法支付那高昂的首期，還有每個月固定的供樓費用……想著想著，他便在西鐵車廂裡睡著了。
此時，他發了一個夢，他夢見自己送Tina回家，在Tina進門前的一刻，那失控的鄰居突然出現，用菜刀不斷砍向Tina，鮮血如泉湧出。阿忠欲阻止那人的時候，卻也被對方在脖子上劃了一刀，死不瞑目的倒在地上。
夢到這裡便完結了，阿忠醒來時嚇出了一身冷汗。
他抬頭一看，發現下一站是元朗，幸好還未過站。
經過了差不多一個多小時，阿忠總算回到天恒邨了。
就在他踏進大廈大堂時，已經接近晚上十二時，這個時間竟然仍有數名住戶正與保安討論著甚麼。
阿忠雖然疲倦，但也著實好奇，於是便慢慢靠近他們。
「華叔，乜咁夜仲咁多人喺度嘅？有咩傾呀？」阿忠也算老住戶了，所以他決定直接問道。
「忠仔，今晚又咁夜呀，同女朋友去玩呀？無呀，啱啱呢幾位住客打嚟投訴十八樓黃生個單位好嘈，我咪上去睇囉！上到去又話無事啦！跟住隔咗一陣佢又嘈，我來來回回去咗三次，之後先靜返。真係被佢玩死！」華叔無奈地說。
「係啦，我住樓下都聽到呀！幾鬼嘈呀！」陳師奶也搭話。
「你都好啲呀，我住正佢樓上呀，幾應聲呀，搞到我個仔係咁喊係咁喊，依家先有時間落嚟抖下氣。」李師奶抱怨。
「你哋都好呀，淨係聽聲，我住佢對面，你哋知今日幾鬼焗㗎啦，我哋諗住慳錢唔開冷氣，咪開住道門囉！跟住呀，頭先佢哋嘈交嗰陣呀，我見到成隻拖鞋飛咗出走廊。我仲見到好似有掟盒𠻹呀，好在道鐵閘擋一擋，先無掟去我哋度！」張師奶看來最受影響。
「吓？咁你仲見唔見到佢哋之後點呀？」陳師奶問。
「無啦，見到咁嘅情況我哋仲唔閂門咩！我跟住咪打落嚟搵華叔囉！華叔真係麻煩你啦！」三名師奶跟華叔道謝。
「唔使客氣，我應該做嘅。係呢忠仔，你都係住十八樓㗎喎？」華叔突然想起。
「我？係呀，黃生就喺我隔籬嗰間屋。」剛剛聽到消息的阿忠，也不禁有點擔憂。
因為在他小時候，天水圍的治安不是很好，亦經常有一些家庭暴力和倫常慘案發生。他曾目睹鄰居拿著菜刀傷人，所以在長大後，對保安方面都十分重視。這也是另一個，他會這麼緊張Tina，盡量送她回家的原因！
了解情況後，他便跟華叔和幾位師奶道別，搭乘升降機回到自己的樓層。
在經過黃先生的單位時，他不禁偷偷看了一下，只見那緊閉的大門上，能看見有好幾處破損的地方，看似是硬物撞擊而成的。
「返嚟啦？」一把低沉的聲音問阿忠，這聲音的主人正是阿忠的父親，謝兆康，姑且稱他為忠爸吧。
「係呀，咁夜都未瞓嘅？」阿忠回到房間，只見他弟弟已經在上格床安睡，他躡手躡腳走進去放好背包，便回到大廳中。
「唉，我都想瞓！頭先隔籬嘈到拆天咁，咪被佢哋嘈醒咗囉！」忠爸手上拿著一罐啤酒，仰頭喝了一口。
「我頭先喺樓下都聽到華叔講，知唔知嘈咩啫？」阿忠也拿了一罐啤酒，坐到忠爸身旁。
「我無聽晒呀，可能又係錢銀問題啦。唉，香港人依家搵錢，邊似我哋以前，肯做就有呀！」忠爸搖了搖頭。
「唉，又係錢……」阿忠垂下頭，深深嘆了一口氣。
「點呀衰仔，又煩緊唔夠錢買樓呀？老竇咪講過囉，我都有啲錢，你可以……」忠爸搭著阿忠膊頭，卻被阿忠打斷了他的話。
「老竇唔使講啦，啲錢你留返嚟享下福啦，買樓啲嘢我會搞掂㗎喇！我同Tina有計劃㗎喇！」阿忠反過來搭著忠爸，堅定地說。
「唉……好啦，有咩唔掂就同老竇講啦！唔好搞到好似隔籬屋兩父女咁就得㗎喇！」忠爸也不再多言。
「收到，老竇你都唔好飲咁多啦，早啲休息啦！」阿忠一口氣把啤酒喝掉，準備回房。
「得啦，我陪多你阿媽一陣就瞓啦！」忠爸指了指櫃內的一張黑白照，照片內就是阿忠的母親，她因癌症而離世多年了。
阿忠看了看照片，對忠爸點了點頭後，便回到床上睡覺了。
但滿腦子都是「買樓」、「慘劇」、「家庭糾紛」等等的事情，他在床上輾轉翻側良久，才能沉沉睡去。
由於胡思亂想的關係，阿忠很晚才能睡著。當他隔天醒來時，發現自己已經遲到了，所以到了晚上他只好獨自留在公司加班來追趕進度。
結果他回到家時，已差不多晚上十一時了。怎料，在大廈的大堂裡，又聚集了不少住戶，正跟華叔交談著。
「華叔，今晚又咁熱鬧嘅？唔係又係黃生呀？」我半開玩笑的說，華叔卻露出了一個無奈的表情。
「唉，係呀。今日兩父女嘈得仲勁過噚日，噚日我上到去，佢哋都至少扮下嘢，我今日去嘅時候，佢哋見我喺度都照嘈，搞到爭啲報警咁滯。」華叔語帶不滿地說。
「咁嚴重？」阿忠也驚訝地說，畢竟在這裡住了超過十年，黃先生一家的確經常吵架，但要出動到警察的，這可是十年來頭一遭。
「係呀，頭先我喺對面睇到，爭啲被佢哋嚇死。本來我同屋企人食緊飯㗎嘛，點知對面屋突然間有人嗌晒救命，本來我只係望望下，點知無啦啦又有嘢飛埋嚟我哋道鐵閘。今次你知唔知咩嚟呀？係刀呀！跟住就見黃生衝出嚟執返把刀又話要斬死佢個女咁，驚起上嚟我咪通知華叔囉！係喎忠仔，頭先你老竇都有出嚟勸交㗎。」住對面的師奶說。
「吓？唔係啩？佢無事呀？咁唔講啦，我返上去先！」阿忠緊張地說。
我趕緊回到家中，只見忠爸正在客廳看電視。
「咦，返嚟啦？餓唔餓呀，我煲咗湯，裝碗畀你飲啦！」忠爸慢慢走到廚房，看來沒有受傷，阿忠也放下心來。
「唔該老竇。聽華叔講，頭先你走咗去勸交喎，下次唔好搞啲咁危險嘅嘢啦！啲人嘈起上嚟真係咩都做得出㗎！」阿忠喝了口湯，然後又擔心起來。
「怕咩，你老竇我幾大隻先得㗎！仲有，十幾年街坊，唔通真係睇住佢哋出事咩？我都無做啲咩，係勸下交啫。」忠爸坐了下來，一臉不在乎。
「係啫，但真係小心啲啦，頭先喺樓下佢哋先講，黃生佢拎埋刀出嚟，安全為上呀老竇。」阿忠仍然放心不下。
「生果刀啫，小事！得啦，總之老竇會睇住㗎啦，你照顧好自己好過啦，晚晚都咁夜瞓！好啦，飲完啦嘛，我幫你洗啦，沖完涼早啲瞓啦！」忠爸把碗接過來後，便慢慢走進廚房，阿忠則進了浴室，洗刷一整天的疲勞。
之後連續數天，阿忠每晚回到大廈，也會在大堂看到華叔和一眾師奶，聽說黃生的吵鬧次數和程度也日漸嚴重了。甚至在阿忠睡覺時，也會聽到隔壁屋傳來爭執聲。
「阿忠！阿忠！你做咩無晒反應㗎？」Tina看著阿忠，不解地問。
「無……無呀，最近唔夠瞓啫。」阿忠無精打采地回應後，便繼續吃飯。
「係喎，好耐無去探過世伯啦，橫掂聽日星期六，不如聽晚上你屋企同世伯食飯啦。」Tina知道阿忠經常要加班，所以她偶爾會提出陪伴忠爸的建議。
「唔……唔好啦，呢排屋企唔係咁方便。」
「吓？點解呀？」Tina不解的問。
「唉，隔籬屋呢排都唔知咩事，日日都嘈生晒！早兩晚呀，屋主仲拎埋刀出嚟，好在最尾無事。我驚陣間你嚟到佢哋又喺度嘈，咁就唔好啦！」阿忠略帶不安地說。
「你就係因為咁瞓唔好呀？」Tina擔心地問。
「少少啦，呢排佢哋就連零晨嗰陣都會喺度嘈，有時阿爸忍唔住又會過去勸交，搞到我又擔心佢去勸交會有咩事，咁咪成日都瞓唔到囉……」阿忠坦白地說。
「阿忠……咁你今晚唔好送我返去啦，好無？不如聽朝同世伯飲茶啦，唔去你屋企食飯都要陪下佢㗎嘛！」Tina就是這樣，當阿忠有任何煩惱，也會站在他的立場去為他著想。
「Tina……唔好啦，呢幾日隔籬咁樣，啲人癲起上嚟真係無咩性，你嗰邊又雜，我都係送你返去好啲！」阿忠還是放心不下。
晚飯過後，阿忠正想送Tina離開時，手機卻響起了，是一個陌生的電話號碼。
「喂！細佬？咩事呀，你唔好喊住先？咩話？我依家即刻過嚟！」阿忠聽完電話後，變得非常緊張。
「咩事呀？」Tina緊張地問。
「阿爸入咗院，我依家去醫院搵佢！」阿忠邊說邊尋找的士。
「我同你一齊去，呢個時間好難截車㗎，我Call的士！」Tina邊對阿忠說邊拿起電話。
半個多小時後，他們終於來到醫院。
「老竇！」阿忠跑進了一間病房，只見忠爸躺在床上，看似沒有甚麼大礙。
「細聲啲啦，醫院嚟㗎！咦，Tina你都嚟咗呀？」
「係呀世伯，你無事嘛？」Tina關心地說。
「哈哈，無事，邊有事啫，你睇我幾健康。要你特登入嚟探我真係唔好意思啦，衰仔，我無嘢啦，快啲繼續陪Tina啦！」忠爸微微屈起右手，展示右臂上那瘦弱的肌肉。
「咩無事呀？細佬呢？佢頭先喊晒咁打畀我，究竟發生咩事？」阿忠緊張地問。
「你細佬同啲差人喺出面落緊口供，好小事……」忠爸說到一半，阿忠忍不住打斷他。
「咩話？落口供？」阿忠語氣錯愕。
「頭先隔籬黃生又同佢個女嘈，可能佢飲咗啲酒啦，又拎住把刀話要劈死佢，我驚有咩事咪過去幫手勸交囉。咁我勸佢放低把刀嗰陣，可能佢醉咗啦，放低嗰陣唔小心整親我囉。」忠爸解釋，並輕拍阿忠表示無事。
「你整親邊呀？手？腳？定邊度呀？」阿忠仍然不放心。
「左腳啫，無事啦，其實都唔係好傷，係你細佬夾硬要我嚟醫院！」忠爸展示左腳上的傷勢，的確不是太嚴重。
「上次都提過你㗎啦，下次你唔好再去勸交啦！隔籬屋真係痴痴地，我聽日就去叫佢唔好再發癲！」
「算啦阿仔，聽講黃生個女好似有咗呀，佢男朋友唔要佢，咁佢老竇咪話去搵個男晦氣，又要佢個女落咗個仔！所以呢排先會日日嘈啫！同埋黃生最近又失業無嘢做，體諒下啦仔！」
「佢哋慘啫，依家搞到我哋喎，我……」阿忠話說到一半，被Tina打斷了。
「阿忠，唔好講啦，世伯受咗傷要休息㗎！我哋都係走啦，畀世伯休息下，聽日再嚟接世伯啦！世伯，我會睇住阿忠㗎喇！」Tina明白兩父子再吵下去也不是辦法，所以盡快帶阿忠離開。
「哇，搞一搞已經咁晏，我送你返去啦。」
「唔使啦，我自己搭的士返去得啦！最多我落車之後同你傾電話，傾到我平安返屋企嘞。」
Tina拒絕了阿忠的提議，阿忠知道說不過Tina只好放棄。
翌日，阿忠正想到醫院替忠爸辦理出院手續時，鄰居又吵起來了。
「衰女，你知唔知醜㗎！搞大咗個肚都算啦，依家個賤男唔要你，你仲想生佢出嚟？唔得，我今日一定要帶你落咗佢！」黃生拿著酒瓶，看上去有點醉意，說到激動處時，更想強行拉走她女兒。
「我講咗幾多次，我唔會落呀，你唔理我又好唔認我又好，我都會生佢出嚟！你唔好再喺度發癲啦，噚日你已經搞到鄰居受傷㗎啦，再嘈落去陣間差人拉你唔好喺度怨！」女兒甩開了她父親的手。
「發癲？你話我發癲？我就發癲畀你睇！」黃生話音剛落，便立即衝進廚房，黃生女兒見狀便奪門而去。
她打開鐵閘後，黃生剛好從廚房走了出來。
那一刻，走廊上的阿忠跟那女孩無助的眼神對上了。
女孩的行動還算敏捷，她本想往升降機方向逃去，但當她察覺到父親正追出來時，無可奈何下只好選擇躲在阿忠背後。
「衰女！你匿去邊呀，同我死過嚟！」看來黃生還是有點理智，至少他看到阿忠時沒有把刀砍向阿忠。
「黃生你冷靜啲先，有咩慢慢講啦，你個女有BB㗎，有咩事就唔好啦！」阿忠實在忍不住開口了。
「關你咩事呀？你再出聲我連你都斬埋！」黃生的舉動也驚動了住在對面的師奶，只見那師奶正在打電話，大概是在報警或連絡大廈保安吧。
「斬我？尋晚我老竇已經被你整傷咗！我都未同你計！你再喺度發癲我就報警等你入去拘留所慢慢嘆！」阿忠也被黃生惹火了。
「發癲？你都話我發癲？好呀，你同個衰女都睇我唔起，當我癲呀嘛！我就斬死你哋之後再自殺！」黃生一時激動起來，把刀砍向阿忠。
–待續–
