第一章 《教師夢》（上）

我都係第一次事前已經問到清清楚楚都仲會發中伏夢。

「無呀，我淨係睇《飛虎出精》呀、《3D豪情》呀、《唐伯虎衝上雲霄》嗰啲戲㗎咋。」

即係就算發夢最多都係見到耷煲May或者冲田杏梨啦！做得過！

點知我喺夢入面淨係見到杜汶澤……

始終人嘅潛意識係一個神秘莫測嘅領域，有好多嘢連宿主本人都未必有自覺。

「好，家人健在？」

「健在。」

然後我喺夢入面被佢老母拎藤條追住嚟打……

「有無女朋友？」

「有呀，拍咗五年拖㗎喇。」

阿俊開手機，無論咩畫面都見到佢同囡囡嘅合照，真係令人羨慕。

又唔睇鬼片，家人又健在，仲有個靚靚女朋友，我諗住實無死啦。

結果見到杜汶澤同籐條老母都算，我仲喺夢度見到奇境。

︽星際啟示錄︾入面阿主角講咗句咁嘅對白：「They are not mountains, they are waves.」

好似海嘯咁高嘅肉色牆壁向我冚過嚟。

「They are not mountains, they are 肥婆s.」

我後來先知道佢就係成日上連登狙擊肥婆嘅雞頭小嘴。

佢親自向我承認成世人最憎肥婆。

不過可能因為佢經常寫文狙擊，令肥婆喺佢潛意識植咗根，於是我先會被肥婆浪淹沒。

嗰陣肥膩感，真係醒咗都仲有餘韻。

老豆成日同我講，憎恨只係愛嘅反面。

事實上人類嘅大腦喺憎人同愛人嗰陣，會產生嘅化學反應都好相似。

表意識嘅恨，可能代表緊潛意識嘅愛都唔定。

夢就係展現潛意識嘅媒介，所以先會成日聽人講發夢同現實係相反。

其實人嘅表意識只係佔全部意識嘅一成左右，其餘九成都由潛意識主導。

人嘅活動，其實受潛意識影響更深。

當我幫阿俊瞓完覺，我就忍唔住問佢借手機睇下佢同女朋友五年嚟嘅合照。

最近期嗰啲，當然係個身材又正又靚嘅女仔啦。

一嘢碌上去之後，我就知自己無估錯……

阿俊嘅囡囡五年前，係個好似埃塞俄比亞飢民咁營養不良嘅女仔。

果然，拍拖係會令人幸福肥。佢囡囡就係被阿俊一步一步餵肥緊。

相信喺不久嘅將來囡囡嘅身形就會有欣宜嘅級數。

「係喇，你女朋友叫咩名？」

「佢叫佩芝呀。」

果然，依條友真係鍾意肥婆！

「係喇，你介唔介意我問多一樣嘢？」

阿俊點點頭。

喺夢中差啲被肥婆海嘯浸死嘅我，用盡九牛二虎之力喺脂肪堆走出嚟，跑咗入去阿俊嘅心房。

心房就好似保護罩一樣，亦係我嘅避風塘。

被怪物追嗰陣都係走入心房先無事。

一個人嘅心房通常都係佢屋企。

如果搬過屋的話，就會係佢細個住得最耐嘅屋企，混合少少新屋嘅環境。

潛意識係喺年幼嗰陣形成，所以當時嘅居住地方會一直烙印喺腦海，形成夢中嘅心房。

心房入面有好多道門，每道門各自會連接過去嘅回憶影像同未來嘅願望幻想。

仲有一道係通去夢之迷宮，入咗去就無咁易出得返嚟。

因為夢之迷宮係人類潛意識中建構嘅現實世界，一入咗去就會唔知自己發緊夢。

我唔係咩解夢人，亦都唔係咩夢專家。

純粹係幫人瞓覺好無聊，有成八個鐘乜都唔做會悶死，所以先好奇睇下客人嘅回憶同願望。

有趣嘅係回憶同願望通常好易分，除非客人嘅願望係「改變過去」，咁過去同未來先會撈埋一碟，不過依種客人比較少。

我打開門，見到阿俊喺一間課室度教緊書。

黑板上，東歪西倒嘅字寫住「help」。

著住恤衫嘅阿俊喺黑板前拎住書吟詩。

「關關雎鳩，在河之洲。窈窕淑女，供不應求。」

課室入面有好多唔同嘅學生，我諗佢哋嘅原型都係阿俊以前嘅同學。

雖然學生都只係木無表情咁聽書，完全無反應，但阿俊仍然自得其樂咁教書。

聽講，一個男人全神貫注做嘢個樣係最有魅力。

「織織復織織，遊子身上衣，起舞弄清影，曲項向天歌，欲窮千里目，低頭思故鄉。」

夢入面，阿俊將曾經學過嘅詩詞歌賦全部打散重組，不過重點唔係教學內容，而係阿俊喺度教書嘅情景。

依段唔係回憶，係願望。

偏偏阿俊搵我幫佢瞓覺嘅原因，同依個願望完全無關······

—待續–

想一次過細閱故事，可立即點擊選購