是咁的,我嘅職業係幫人瞓覺

是咁的,我嘅職業係幫人瞓覺(做金庸的男人)

楔子 《入夢者》

是咁的,我嘅職業係幫人瞓覺。

如果你想自己多啲時間用,可以搵我。

啲人成日話:「嗱,時間就大家都得咁多㗎喇,點解佢做到你做唔到先?」

但係依個講法,係錯㗎,仲要大錯特錯。

視乎需要,一個正常人每日會瞓八至十個鐘頭,即係剩低十四至十六個鐘頭係清醒可以做嘢嘅。

如果一個人可以唔使瞓覺,咁相對地就多咗八粒鐘可以用,而我嘅能力呢,就係幫想多啲時間用嘅人瞓埋佢嗰份。

雖然我嘅能力有距離限制,但只要建立好契約,我就可以幫你瞓覺。

喺我瞓緊嘅時間入面,你就唔會瞓著,仲會keep住精神飽滿㖭!

不過多咗時間,你會點用,就見仁見智。

我就遇過客人搵我瞓覺,話要多八個鐘溫考試,結果都係考到一鑊粥。

我問佢用啲時間嚟做乜,佢嘅答案係食零食呀、煲劇呀、碌fb同ig呀、屙屎沖涼同捽腳趾。

多咗嘅時間唔用嚟做正經嘢,畀幾多時間你都無用。

喺幫客人瞓覺嗰陣,我就會以清醒狀態進入佢哋嘅夢境。

夢境就係潛意識嘅世界。表意識同潛意識會互相影響,所以客人喺現實中嘅經歷有時會喺夢境之中反射出嚟。

「請問你近期有無睇過恐怖片呢?」我最驚就係遇到睇過恐怖片嘅客人。

因為佢哋好容易發噩夢。客人一發噩夢,我就會喺夢入面被貞子異形德州電鋸殺人狂同恐懼鬥室高海寧追到天荒地老……

面前嘅客人叫阿俊,佢認真咁思索緊自己有無睇恐怖片。

雖然我好想講「俊?邊L度俊呀?睇過~」依句經典對白,但佢係客人,我無理由趕客啫。

由於我唔可以幫太遠嘅客人瞓覺,一定要喺佢哋附近先用到能力,所以好多時會上客人屋企瞓梳化。

不過阿俊唔係自己一個住,所以我哋唯有喺廿四小時老麥見面。

點解我會特登拎依個叫阿俊嘅客人出嚟講呢?

因為佢令我大開眼界。

—待續–

想一次過細閱故事,可立即點擊選購

評分:4.5 分,滿分為 5。

發表迴響

%d 位部落客按了讚: